पूर्वी पहाडमा खनिज पदार्थ खोज्दै भूगर्भविद

लाक्पासांगे शेर्पा ११ बैशाख, संखुवासभा । खानी तथा भुगर्भ विभागको टोली संखुवासभासहितका ६ वटा पहाडी जिल्लामा खजिनपर्दाथ खोज्न निस्केको छ । संखुवासभाबाट गत चैत १९ देखि थालिएको आन्वेषण भोजपुर, ताप्लेजुङ, धनकुटा तेह्रथुम र पाँचथरसम्म गरिने कार्यक्रम रहेको टोलीका प्रमुख बरिष्ठ भूगर्भविद दिनेश नेपालीले बताए । ६ जना भूगर्मविदको टोलीले ८० दिन सम्म खनिज पदार्थको खोजी गर्ने भएको छ ।
टोली पहाडको करिब १३ सय वर्ग किलोमिटर क्षेत्रमा भौगोलिक नक्सांकन र धातु खनिज अन्वेषण अनुसन्धानमा खटिएको हो । भूगर्भविदको पहिलो टोलीले भौगर्भिक नक्सांकन गर्दै चट्टान, धातुअधातुको पहिचान गरी भौगर्भिक नक्सा बनाउने छ । दोश्रो टोलीले सुन, तामा, फलाम र सिसाजस्ता पदार्थको आन्वेषण गर्ने भूगर्भविद सौनक भण्डारीले बताए । तेश्रो टोलीले अधातुहरु चुनढुंगा, खरीढंगा, अभ्रक, रातोमाटो, ग्रेनाइट, मार्वल, स्लेट, किम्ती तथा अर्धकिम्ती पत्थरहरु टुर्मालिन,काइनाइट कुरिन, क्वारर्ज लगायत अधातुको आन्वेषण गरिरहेको छ । टोलीमा भूगर्भविदहरु भूगर्भविद दिनेश नेपाली टोली प्रमुख, भूगर्भविदहरु शिव कुमार बास्कोटा, कुमार केसी, नारायण बास्कोटा, विश्वराज सिलवाल, सौनक भण्डारी र सहयक भूगर्भविद नविन तामाङ छन् । टोलीले केही दिनयता संखुवासभाको चैनपुर र मुढे बजार केन्द्रित भएर खोलाबाट बालुवा र चट्टानको नमूना पनि संकलन गरिरहेको छ ।
संखुवासभाको प्रारम्भिक अनुसन्धानमा फलामको खानीको बढी संभावना रहेको भूगर्भविद कुमार केशीले बताए । अनुसन्धान गर्न समुद्री सतहदेखि २ सय मिटरमाथि र ३६ सय मिटरवीचको क्षेत्र छानिएको भुगर्भविदहरुले बताएका छन् । टोली प्रमुख भूगर्भविद दिनेश नेपालीका अनुसार हाल अनुसन्धान जारी रहेको १३ सय वर्ग किमी क्षेत्रमा सरकारले खनिज उत्खननमा प्रतिबन्ध लगाएको छ । यस क्षेत्रबाट टोलीले सुनको अनुसन्धान गर्न २ सय प्रकारको वालुवा र ४ सय प्रकारको ढंगाको नमुना संकलन गरी काठमाडौ लग्ने छ । पाल टाँग्दै अनुसन्धान गर्दै भुगर्भविदहरुको टोलीले पुर्वी पहाडमा पैदलयात्रा गर्दै अनुसन्धान गरिरहेको छ । ‘सरकारले सामान्य दैनिक भ्रमणभत्ता दिएको छ’, टोलीका प्रमुख भूगर्भविद दिनेश नेपालीले भने, ‘सरकारले टेन्ट टाँगेर काम गर्नु भनेका विकट ठाँउमा टेन्ट टाँगेरै बसेर अनुसन्धान सक्छौं ।’